“ADY Express” 8500 ton bitumun Ukraynaya ixracını həyata keçirib - FOTO

“ADY Express” MMC yeni növ ixrac yüklərinin daşınma prosesini davam etdirir. MMC-dən bildirilib ki, bu dəfə Dövlət Neft Şirkətinin Heydər Əliyev adına Neft Emalı Zavodunun istehsalı olan bitum Ukraynaya nəql edilməyə başlayıb.

Layihə “Azərbaycan Dəmir Yolları” QSC-nin törəmə şirkəti olan “ADY Express” MMC və SOCAR-ın Marketinq və İqtisadi Əməliyyatlar İdarəsinin birgə layihəsidir. İlkin olaraq ümumilikdə 8500 ton bitum 130 çən vaqona yüklənərək Ukraynaya göndərilib. “ADY Express” tərəfindən təqdim olunan vaqonlar, Heydər Əliyev adına Neft Emalı Zavodunda bitumla yükləndikdən sonra yola salınıb.

Çən vaqonlar Azərbaycandan Gürcüstana oradan Qara dənizdən bərə vasitəsilə keçərək Ukraynanın Orlovşina və Vasilkov stansiyasına çatdırılır. Daşıma prosesi 2 mərhələdən ibarət olub. 1-ci mərhələdə 4500 ton bitum 70 çən vaqona yüklənərək yola salınıb, 2-ci mərhələdə 4000 ton yük 60 vaqona yüklənərək daşımaya start verilib.

Azərbaycandan Ukraynaya bu növ yüklərin davamlı nəql edilməsi nəzərdə tutulub.