Avtobusda kondisioneri işlətmədi, xəbərdarlıq olundu - RƏSMİ

Paytaxtda fəaliyyət göstərən 157 nömrəli marşrut xəttində hərəkət edən avtobuslarda havaların kəskin isti keçməsinə baxmayaraq kondisionerlərin işlədilmədiyi iddia olunur.

Avtosfer.az xəbər verir ki, sərnişinlər avtobusların salonunda yüksək temperaturun müşahidə olunduğunu, bu səbəbdən xüsusilə günün isti saatlarında səfərin çətinləşdiyini bildirirlər.

Mövzu ilə bağlı Azərbaycan Yerüstü Nəqliyyat Agentliyindən (AYNA) Avtosfer.az-ın sorğusuna cavab olaraq bildirilib ki, hər il yay mövsümü başlamazdan əvvəl müntəzəm sərnişindaşıma fəaliyyəti göstərən daşıyıcılara rəsmi qaydada xəbərdarlıq məktubu göndərilir:

"Havanın temperaturundan asılı olaraq avtobuslarda sərnişinlərin rahatlığı üçün sərinləndirmə sistemlərinin işlək vəziyyətə gətirilməsi tapşırığı verilir. Bununla bağlı məsələ tərəfimizdən diqqətdə saxlanılır. Kondisionerlə təchiz edilmiş avtobuslarda soyutma sisteminin işlək vəziyyətdə olması müşahidə edilir. Lakin hər hansı avtobusun kondisioner sistemində texniki nasazlıq yarana bilir. Belə olan halda nasazlığın tez bir zamanda aradan qaldırılması ilə bağlı tədbir görülməsi barədə daşıyıcıya xəbərdarlıq edilir. Sözügedən marşrutun daşıyıcısına da nizamlı fəaliyyətin təmin edilməsi ilə bağlı xəbərdarlıq edilib".

Fatimə Dadaşova