Bakıda ictimai nəqliyyatdan istifadə pandemiyadan əvvəlki göstəricinin 85%-nə çatıb

“Koronavirus (COVID-19) pandemiyası dövrünün çətinliklərinə baxmayaraq Bakıda avtobus parkının və nəqliyyat infrastrukturunun inkişafına dövlət investisiyaları davam edib ki, bu da, hər hansı fövqəladə hallarda sərnişindaşıma və mobilliyin təmin edilməsi üçün mühüm əhəmiyyət kəsb edir”.

Avtosfer.az Bakı Nəqliyyat Agentliyinə istinadən xəbər verir ki, bunu qurumun aparat rəhbəri Gülşən Rzayeva bildirib.

O, post-COVID dövrünün əsas prioritetlərindən olan piyada zonaları və velosiped yollarının yaradılması, avtobus parkının yenilənməsinin, mərkəzləşdirilmiş dispetçer xidmətinin fəaliyyətinin genişləndirilməsinin, ümumilikdə şəhər mobilliyinin inkişafı istiqamətində gələcək planlar barədə məlumat verib və ictimai nəqliyyata etibarın bərpa edilməsinin əsas məqsədlərdən olduğunu bildirib. G.Rzayevanın sözlərinə görə, bu ilin oktyabr ayında ictimai nəqliyyatdan istifadə ilk dəfə pandemiyadan əvvəlki göstəricinin 85%-nə çatıb ki, bu da ictimai nəqliyyata etibarlılığın artmasını göstərir.