Bakıda kimlər pulsuz avtobuslardan istifadə edə biləcək? – AÇIQLAMA

Bakının mərkəzi piyada zonalarında yeni nəqliyyat həlli tətbiq olunub.

Hərəkətin məhdudlaşdırıldığı ərazilərdə yerləşən ictimai iaşə obyektləri və istirahət məkanlarına gediş-gəlişi asanlaşdırmaq üçün ödənişsiz şatl elektrik mikroavtobusları istifadəyə verilib.

Belə bir yenilik isə sözügedən mikroavtobuslardan kimlərin istifadə edə biləcəyinə dair maraq doğurub.  

Mövzu ilə bağlı nəqliyyat eksperti Elməddin Muradlı qeyd edib ki, pulsuz avtobuslardan istifadə ilə bağlı hər hansı məhdudiyyət yoxdur. Belə bir anlayış mövcud deyil:

"Avtomobilini kənarda saxlayaraq piyadalaşdırılmış ərazilərə daxil olmaq istəyən şəxslər bu nəqliyyat vasitələrindən rahat şəkildə yararlana bilərlər. Eyni zamanda, dayanacağa çıxmaq və ya metro stansiyasına yaxınlaşmaq istəyən insanlar da bu şatl mikroavtobuslardan istifadə edə bilərlər".

Elməddin Muradlı hesab edir ki, bu, ölkənin nəqliyyat sektorunda uğurlu layihələrindən biridir:

"Layihə çox faydalı olacaq. İstifadəyə verilən nəqliyyat vasitələri həm funksionallıq, həm də tərtibat baxımından müsbət qiymətləndirilməlidir. Belə təcrübə bir çox ölkələrdə mövcuddur. Əgər şəhər mərkəzində avtomobillərin hərəkəti məhdudlaşdırılırsa və piyadalaşdırılmış zonalar yaradılırsa, həmin ərazilərdə insanların alternativ nəqliyyata əlçatanlığı da təmin olunmalıdır"./EDnews