Bakıda xəstəlik yaymaqda təqsirləndirilənlərin məhkəməsi başlayır

Epidemiya əleyhinə rejimi pozmaqda təqsirləndirilən Bakı şəhər sakinləri – Samid Qədirov, Əflatun Babalıyev və Tufan Qəmbərovun cinayət işi ibtidai istintaqı başa çatıb. Cinayət işi baxılması üçün Qaradağ Rayon Məhkəməsinə göndərilib.

Hakim Teymur Qurbanovun icraatında olan iş üzrə hazırlıq iclası iyulun 15-də başlayacaq.

Qeyd edək ki, təqsirləndirilən şəxslər Cinayət Məcəlləsinin 139-1.1-ci (Epidemiya əleyhinə rejimin, sanitariya-gigiyena və ya karantin rejimlərinin pozulması xəstəliklərin yayılmasına səbəb olduqda və ya xəstəliklərin yayılması üçün real təhlükə yaratdıqda) maddəsi ilə təqsirləndirilirlər.

Cinayət Məcəlləsinə mart ayında əlavə olunmuş bu maddəyə görə, həmin əmələ yol verən şəxslər 2 500 manatdan 5 000 manatadək miqdarda cərimə və ya 3 ilədək müddətə azadlığın məhdudlaşdırılması və ya 3 ilədək müddətə azadlıqdan məhrum etmə cəzası nəzərdə tutulub. (“Report”)