“BMW” ilə gələn üç nəfər avtoyumada işçini döydü – Polis onları axtarır

Rusiyanın Vladivostok şəhərində  avtoyuma məntəqəsində bir qrup şəxs tərəfindən işçinin döyülməsi ilə bağlı polisə məlumat daxil olub. Avtosfer.az xəbər verir ki, bu barədə Rusiya Daxili İşlər Nazirliyinin Mətbuat xidmətinin Primorsk bölgəsi üzrə regional qrupundan məlumat verilib.

Məlumata görə, “BMW” markalı avtomobillə avtoyuma məntəqəsinə gələn üç naməlum şəxs orada işləyən əməkdaşı döyüblər və sonra da hadisə yerindən uzaqlaşıblar. 

Xəsarətlər alan işçi tibb məntəqəsinə müraciət edib.

Şahidlər isə, bununla bağlı polis bölməsinə xəbər veriblər və dərhal hadisə yerinə polis əməkdaşları cəlb olunub. Əməkdaşlar zərərçəkənlə söhbətlər apararaq ondan cinayətkarların əlamətləri barədə məlumat alıblar.

Hazırda 3 şübhəlinin yaxalanması istiqamətində əməliyyat-axtarış tədbirlərinə başlanılıb.

Namiq Musayev