Bulvarda yaxta necə oğurlandı? – TƏFƏRRÜATLAR + VİDEO

Bakı buxtasında Xəzər Dəniz Gəmiçilik idarəsinin keçmiş rəisi Aydın Bəşirovun ailəsinə məxsus yaxtanın yoxa çıxması məsələsinə aydınlıq gəlib.

Avtosfer.az xəbər verir ki, anstv-nin məlumatına görə, bəlli olub ki, yaxtanı kimsə oğurlamayıb. 

Amma bir neçə gün əvvəl Füzuli Abdullayev adlı şəxs Bakı buxtasındakı “Yaxt-klub”da lövbər salan 65 metrlik yaxtasının oğurlanması ilə bağlı polisə şikayət edib. 

Araşdırmalar zamanı isə əslində yaxtanın oğurlanmadığı aşkara çıxdı. Ortaya çıxan daha bir maraqlı fakt isə oğurlandığı iddia olunan gəminin Aydın Bəşirovun oğluna məxsus olması idi. Deməli, Aydın Bəşirov Xəzər Dəniz Gəmiçilik idarəsinə rəhbərlik etdiyi vaxtlarda, Bakıdan İranın Ənzəli limanı marşrutu üzrə hərəkət edən “Vətən” adlı gəmini oğlunun adına özəlləşdirib.

Oğlu isə özəlləşdirilən dövlət əmlakını yaxta kimi yenidən qurdurub. 

Bu məlumatları Xəzər Dəniz Gəmiçilik idarəsində də təsdiqləyirlər. Düzdür, yaxtanın sahibinin soyadı Bəşirov olmasa da, keçmiş rəis Füzuli adlı şəxsin oğlu olduğunu bəyan edib.

Necə olur ki, bir məmur övladı dövlət əmlakını özəlləşdirir və onun saxlanılmasına külli-miqdarda vəsait sərf edir. Axı yaxtanın saxlanılma xərcləri az deyil.

Nəzərə alsaq ki, Aydın Bəşirovun məmur işlədiyi zaman dövlətdən aldığı məvacib 1500-2000 manat arasında olub. Bəs bununla yaxtanı necə saxlamaq olar? Elə bu zaman ortaya çoxlu suallar çıxır.

“Məmurların, eləcə də dövlət qulluqçularının əmək haqları, onların böyük məbləğdə və bahalı dövlət əmlakını özəlləşdirməsinə imkan vermir. Əgər aldığı həmin əmək haqqı ilə məmur yaşayıbsa və işləyibsə, həmin məmurun həmin əmlakı almaqla bağlı ödəniş etmək imkanı yoxdur. Amma təəssüflər olsun ki, məmurlar və onların övladları bahalı dövlət əmlakını ona görə alırlar ki, həmin qurumlarda korrupsiya halları baş verir”, - deyə iqtisadçı-ekspert Vüqar Bayramov bildirib. 

Baxmayaraq ki, prezident İlham Əliyev müşavirələrində dəfələrlə məmurların, onların övladlarının qeyri-qanuni əməllərini tənqid edib.