Əhmədbəyli-Füzuli-Şuşa yolunun tikintisi nə vaxt yekunlaşacaq? - VİDEO

Əhmədbəyli-Füzuli-Şuşa avtomobil yolunun tikintisi davam etdirilir.

Avtosfer.az-ın məlumatına görə, bu yol başlanğıcını Hacıqabul-Horadiz-Ağbənd-Zəngəzur dəhlizi magistral avtomobil yolundan götürməklə işğaldan azad edilmiş Füzuli, Xocavənd, Xocalı və Şuşa rayonlarının ərazisindən keçir. Azərbaycan Avtomobil Yolları Dövlət Agentliynin mətbuat xidmətinin rəhbəri Anar Nəcəfli deyib ki, 1-ci texniki dərəcəli və 81,6 km uzunluğa malik Əhmədbəyli-Füzuli-Şuşa avtomobil yolunun tikintisi sürətlə davam etdirilir. Bildirilib ki, yol boyu bir neçə tuneldə qazma işləri tamamlanıb, digərlərində isə qazma, partlatma və qırıcı üsulları ilə qaya qruntlardan ibarət hissələrin kənarlaşdırılması işləri davam edir. Bundan başqa, tunellərdə havalandırma və izolyasiya sistemləri də quraşdırılır. Əhmədbəyli-Füzuli-Şuşa avtomobil yolunda tunellərin inşası ilə yanaşı yol boyu müxtəlif hissələrdə torpaq yatağının, körpülərin, yeraltı keçid və suötürücü boruların tikintisi də layihəyə uyğun şəkildə icra olunur. 4 və 6 hərəkət zolaqlı olan yolun yatağının eni 29,5 metr təşkil edir. Anar Nəcəfli onu da bildirib ki, Qarabağ və Şərqi Zəngəzur iqtisadi rayonları ərazisində icra olunan, işğaldan azad edilmiş rayon və kəndlərin yol infrastrukturu layihələrindən biri sayılan Əhmədbəyli-Füzuli-Şuşa avtomobil yolunun tikintisinin 2024-cü ildə başa çatdırılması planlaşdırılır.