Gürcüstanda azərbaycanlılarla ermənilər arasında dava; 11 nəfər saxlanıldı

Gürcüstanda azərbaycanlılarla ermənilər arasında münaqişə baş verib. Avtosfer.az yerli KİV-ə istinadən xəbər verir ki, hadisə avqusutun 24-də Ninotsminda bələdiyyəsi ərazisində yerləşən iki kəndin sakinləri arasında qeydə alınıb.

Məlumata görə, Tuşeti kəndində yaşayan azərbaycanlı sakinlərin mal-qarası, Toriyada yaşayan erməni torpaq sahiblərinin örüş sahəsinə daxil olub və torpaq sahibləri heyvanları qovub. Bundan sonra azərbaycanlı sakinlərlə torpaq sahibləri arasında, əvvəlcə mübahisə, daha sonra isə dava yaşanıb. Nəticədə 11 nəfər polis tərəfindən saxlanılıb, onlardan 7-si xəstəxanaya aparılıb.

Yaralılara ilkin tibbi yardım göstərildikdən sonra bölməyə gətirilərək ifadələri alınaraq sərbəst buraxılıblar.

Bildirilir ki, faktla bağlı Gürcüstan Cinayət Məcəlləsinin 126-cı və 225-ci maddəsi ilə cinayət işi açılıb.
 

Namiq Musayev