"Metronun "20 yanvar" və "Koroğlu" stansiyaları istiqamətində hər gün axşam və səhər saatlarında xaotik vəziyyət müşahidə olunur. Koroğlu Nəqliyyat Mübadilə Mərkəzindən Bakının müxtəlif kəndləri isfiqamətində hərəkət edən avtobuslar var. Amma insanlar metrodan çıxıb müəyyən bir məsafəni qət edərək həmin mübadilə mərkəzinə getmək istəmir, "1 manatlıq taksilər"dən və ya digər qanunsuz sərnişindaşıma vasitələrindən istifadə edir. Nəticədə həm yolda xaotik vəziyyət baş verir, həm də daşıyıcı şirkətlər itirir".
Ucnoqta.az xəbər verir ki, bunu avtobus zolaqları ilə bağlı keçirilən mətbuat konfransında Bakı Nəqliyyat Agentliyinin mətbuat xidmətinin rəhbəri Mais Ağayev deyib. Bəs insanlar niyə ictimai nəqliyyata deyil, "1 manatlıq taksilər"ə üstünlük verir? Əhali arasında apardığımız qısa sorğuda belə məlum oldu ki, avtobusların gec-gec işləməsi, mənzil başına gec çatması, avtobuslarda sərnişin sıxlığı, bəzi sürücülərin avtobusu kobud idarə etməsini göstərdilər. Bakıətrafı qəsəbələrdən gələn sərnişinlər isə avtobusun H. Əliyev prospekt ilə deyil, Ramana qəsəbəsinə daxil olaraq hərəkət etməsini vaxt itkisi kimi dəyərləndirdi.
Bu sualla nəqliyyat eksperti Elməddin Muradlıya müraciət etdik.
Ekspert bildirdi ki, manatlıq taksilər onlara tələbat olduğu üçün formalaşıb: "Bakı Nəqliyyat Agentliyinin yarıtmaz fəaliyyəti nəticəsində Bakıda avtobus parkı yenilənmək əvəzinə, inkişafdan qalıb. Sərnişin tələbatı artsa da, avtobuslar bu tələbatı ödəmir, bu səbəbdən sərnişinlər taksilərə üz tutur. Hətta bəzən 90-cı illərə qayıdırıq, marşrut xətlərinə qanunsuz sərnişin daşıyan kiçiktutumlu avtobuslar və mikroavtobuslar da daxil olur. Bunların qarşısının alınması üçün normal ictimai nəqliyyat təqdim etmək lazımdır. Danışdıqca özlərini biabır edirlər. Çıxış yolu kimi avtobus zolaqları çəkməyi təklif edirlər. Əlbəttə, avtobus zolaqları olmalıdır, ictimai nəqliyyat dəqiq işləməlidir. Amma köklü yenilik etmək lazımdır ki, insanlar faydalansın".
Elməddin Muradlı vurğuladı ki, ictimai nəqliyyatın vəziyyəti yaxşı deyil: "Yarım saatdan bir avtobus gəlir. Zolaq da çəkiləndə hərəkət iflic olur. Yanaşma düzgün deyil. Vəziyyətdən çıxış üçün kompleks tədbirlər görülməlidir. Keçmiş nəqliyyat naziri də bu qaydada işləyirdi. Təhlil aparılmadan, layihələndirlmədən görülən işlər indi paytaxtda belə problemlərə gətirib çıxardı".

Emin