İnsanları yol kənarlarından toplayıb rayonlara aparırlar... - EKSPERTDƏN AÇIQLAMA

Son vaxtlar bölgələrə qanunsuz sərnişindaşıma halları ilə bağlı şikayətlər artıb. Sərnişinlər sosial şəbəkədə bildirirlər ki, bu cür avtobusların əksəriyyəti texniki cəhətdən nasazdır və uzun məsafələrə təhlükəli şəraitdə hərəkət edir. 

Məlumata görə, qanunsuz sərnişindaşıma ilə məşğul olan şəxslər avtovağzallardan kənar yerlərdə – yol kənarlarında, həyətlərdə sərnişin toplayaraq rayonlara aparırlar. Bu cür halların həm sərnişinlərin təhlükəsizliyi, həm də nəzarət baxımından ciddi problemlər yaratdığı qeyd olunur.

Qeyri-qanuni fəaliyyət göstərən nəqliyyat vasitələrində nə texniki yoxlamalar aparılır, nə də sürücülərin peşəkarlığına dair təminat verilir.

Nəqliyyat eksperti Elməddin Muradlı bildirib ki, sərnişindaşımanın öz prinsip və qaydaları mövcuddur:

"Nazirlik Avtovağzal kompleksi ölkədə avtobus parkının yeni olmadığını və kifayət qədər köhnə avtobusun olduğunu etiraf edib. Lakin bunu yenisi ilə əvəz etmək imkanı yoxdur. Bu səbəbdən də əlimizdən olan imkanlardan istifadə etməliyik. Bu həm şəhər daxili, həm də şəhərlər arası sərnişin daşımada keçərlidir. Çıxış yolu avtobus parkının tam yenilənməsidir. Kütləvi şəkildə, digər ölkələrdən avtobusların gətirilməsi sual doğurur. Çünki, daşıyıcılar buna hazır deyil. Qanunsuz sərnişindaşıma ilə məşğul olan şəxslər yol kənarlarından, həyətlərdən insanları toplayırlar. Ona görə də, avtovağzala sərnişin gəlmir. Bu da hərəkət intensivliyinin azalmasına səbəb olur".

Ekspert hesab edir ki, nəqliyyatın köhnə olması böyük problem deyil:

"Çünki lazım olduqda, texniki parametrlər və sürücülərin səhhəti yoxlanılır. Təzə avtobusların gətirilməsi isə, çox bahadır. Həmçinin, qiymət ilə yanaşı, gömrük rüsumları da buna təsir göstərir".(Modern.az)