Metroda SOS aparatını necə istifadə etməliyik?

Bakı metro stansiyalarında quraşdırılan SOS aparatları haqqında məlumatınız var. Adətən metroda görüşəndə bu aparatların yanında dayanır və “SOS-un yanına gəl” deyirik, görüşəcəyimiz şəxsə. Yəni bu aparatlar bir növ görüş yeri olub.

Bəs onların əsil işi-vəzifəsi nədir? Bu aparatlar nə üçün quraşdırılıb?

Bu dəfə də Bakı metropolitenlərində quraşdıran SOS aparatlarını araşdırdıq.

Avtosfer.az xəbər verir ki, mövzu ilə bağlı Bakı Metropoliteni “QSC” mətbuat xidməti və ictimaiyyətlə əlaqələr şövbəsinin rəisi Nəsimi Paşayev atv-yə bildirib ki, stansiyalarda quraşdırılan SOS aparatları ancaq fövqəladə hadisələr zamanı istifadə olunması üçün nəzərdə tutulub.

“Əgər hər hansı fövqəladə hadisə baş verərsə, bu aparatlar vasitəsilə birbaşa dispetçerə məlumat verilir. Telefonun dəstəyini qaldıran kimi zəng eləyən adamı videokamera qeydə alır. Yəni hər hansı yanlış məlumat zamanı bunu ayırd etmək mümkündür. Eyni zamanda, aparatdakı digər kamera vasitəsilə dispetçer verilən məlumatın doğruluğunu canlı olaraq izləmək imkanına malikdir.

İndiyə kimi stansiyalarımızda hər hansı fövqəladə hadisə baş vermədiyi üçün bu aparatlardan istifadə edilməyib. Lakin bir neçə məsuliyyətsiz sərnişin bu aparatdan istifadə edib ki, bu zaman da onlar inzibati məsuliyyətə cəlb ediliblər”.