Murovdağ tunelinin tikintisinin nə zaman bitəcəyi AÇIQLANDI
Gündəm 28 İyun 2022 15:58 Oxunub 696
Murovdağ tunelinin tikintisinin nə zaman bitəcəyi AÇIQLANDI

İşğaldan azad olunmuş rayonlarda yol infrastrukturu əsaslı şəkildə yenidən qurulur. Göygöl rayonunda Toğanalı-Kəlbəcər avtomobil yolunun 13-cü kilometrliyində inşa edilən iki tunel də bu layihələr arasında xüsusi yer tutur. Hazırda iki çıxış, iki giriş olmaqla, dörd hissədə tikinti-quraşdırma işləri sürətlə davam etdirilir. Bir istiqamət üzrə iki kilometr, ümumilikdə isə, Murov dağı tuneli üzrə 4 kilometr hissədə qazma, partlatma və ilkin betonlama işləri başa çatıb.

Avtosfer.az xəbər verir ki, bunu “Azərbaycan Avtomobil Yolları” Dövlət Agentliyinin layihələr üzrə mühəndisi Əyyub Hüseynov bildirib.

O qeyd edib ki, Toğanalı-Kəlbəcər avtomobil yolunun ümumi uzunluğu 56 kilometr, tunellərin ümumi uzunluğu isə 25,2 kilometr təşkil edir. Layihə üzrə 4 tunelin tikintisi, 191 ədəd düzbucaqlı və dairəvi boru olmaqla, su ötürücü boruların inşası, 6 körpünün inşası nəzərdə tutulub.

“Tunel üzrə qazma-partlatma işlərinin 2024-cü ilin axırına tamamlanması planlaşdırılır. Bundan sonra yardımçı tikililərin inşasına başlanacaq. Tuneldə havalandırma, işiqlandırma və digər yol avadanlıqlarının quraşdırılması işləri 2025-ci ilin sonunadək tamamlanacaq”, - deyə mühəndis vurğulayıb.

Qeyd edək ki, Toğanalı-Kəlbəcər-İstisu avtomobil yolu başlanğıcını Göygöl rayonunun Toğanalı kəndindən götürməklə Kəlbəcər rayonunun ərazisindən keçir. Buna görə də yol rayonun bir çox yaşayış məntəqələri ilə yanaşı, Kəlbəcər şəhərinə və məşhur İstisu ərazisinə qədər rahat gediş-gəlişi təmin edəcək. (Azərtac)

ŞƏRH YAZ
Ad

E-mail

Şərh