Prezident Aparatının 8 əməkdaşı koronavirusa yoluxdu

Qırğızıstan Prezident Aparatının 8 əməkdaşında koronavirus (COVID-19) aşkarlanıb. Bu barədə Qırğızıstan Prezidentinin mətbuat xidməti məlumat yayıb.

Bildirilib ki, dövlət başçısı Sooronbay Jeenbekovun rəhbərliyi ilə Moskvaya səfər edən nümayəndə heyətinin iki üzvündə - Aparatın xarici siyasət şöbəsinin müdiri Daniyar Sadıkovda və mühafizə xidmətinin bir əməkdaşında koronavirus aşkarlandıqdan sonra Bişkekdə Prezident Aparatının bütün əməkdaşları test veriblər. Virusa yoluxan 8 əməkdaş ev şəraitində müalicə ediləcək. Aparatın digər əməkdaşları isə onlayn qaydada işləyəcəklər.

Qeyd edək ki, Qırğızıstanda son sutkada 250 nəfər virusa yoluxub və xəstələrin sayı 4204-ə çatıb. COVID-19-a yoluxanlardan 43-ü ölüb, 2162-si sağalıb, 1999 xəstənin müalicəsi davam edir. (Modern.az)