Qızmar havalarda avtomobildə uşaq və heyvan saxlamaq niyə təhlükəlidir?

Yay aylarında hava temperaturunun yüksəlməsi ilə bağlı avtomobillərdə uşaq və heyvan saxlamaq ciddi təhlükə yaradır. Ekspertlər xəbərdarlıq edir ki, qapalı və havalandırılmayan avtomobillərdə temperatur sürətlə arta bilər və bu, həyat üçün ölümcül ola bilər. Avtosfer.az "Baku.ws"ə istinadən xəbər verir ki, Milli Səhiyyə İdarəsinin məlumatına görə, qızmar havada avtomobilin içərisində bir saat ərzində temperatur 50-60 dərəcəyə qədər yüksələ bilər. Bu isə uşaq və heyvanlarda istilik vurması, dehidrasiya və hətta ölüm riski ilə nəticələnir. Həkimlər vurğulayır ki, uşaqların və ev heyvanlarının bədən temperaturu böyüklərdən daha sürətlə yüksəlir və onların termorequlyasiya sistemi kifayət qədər inkişaf etməyib. Buna görə də, qapalı avtomobildə qısa müddət belə qalmaları təhlükəlidir. Əlavə olaraq, avtomobildə açıq pəncərə belə temperaturun qənaətbəxş düşməsinə kifayət etməz. Valideynlərə və heyvan sahiblərinə çağırış edilir ki, heç vaxt uşaqları və ya heyvanları tək başına avtomobildə qoymasınlar.