28 saat yatmayan sürücü məhkəməyə verildi

Bu günlərdə İsveçrə polisi yolda ziqzaqla hərəkət edilən ağırtonajlı avtomobili saxlayıb. 

Avtosfer.az xəbər verir ki, Türkiyədən gələn avtomobilin sürücüsü şübhə yaratdığı üçün polis taxoqrafa baxış keçirib.

Məlum olub ki, türk sürücü 27 saat 28 dəqiqə ciddi fasilə vermədən sükan arxasında olub. Başqa sözlə, o, avtomobildən yalnız yanacaq doldurmaq və bir neçə dəqiqə dincəlmək üçün düşüb. 

Taxoqrafa baxış keçirərkən onun fevraldan iyuladək 29 dəfə oxşar qayda pozuntusuna yol verdiyi üzə çıxıb. Buna görə də sürücüyə 5000 frank (10 000 manat) cərimə yazılıb, iş baxılmaq üçün məhkəməyə göndərilib.

Məhkəmə bitənədək avtomobilə və yükə həbs qoyulub.

İsveçrə qanunvericiliyinə görə sürücünün sutkalıq iş rejimi 9 saat müəyyən edilib və buna 90 ildir ciddi nəzarət edilir. 

Bu, türkiyəli sürücülərlə bağlı ilk hal deyil. Martda Barselona polisi 13 saat dayanmadan sükan arxasında olan və ümumilikdə 30 qayda pozan sürücüyə 47 000 avro cərimə tətbiq etmişdi.

Başqa bir sürücüyə isə bu ilin ilk 5 ayında Polşa, Lüksemburq və Fransada üst-üstə 100 min avrodan çox cərimə yazılıb. Bütün hallarda səbəb iş normasının pozulması və taxoqrafa müdaxilədir. 

Türkiyə mediasında bu xəbərlər ya işıqlandırılmır, ya da diskriminasiya kimi təqdim edilir. Lakin, qədim Romada deyildiyi kimi, “dura lex, sed lex”, yəni qanun nə qədər sərt olsa da, qanundur. Başqa sözlə, “müdir deyir ki, yatma, sür” prinsipi Avropada işləmir.

Yuxulu sürücü Avropada mübaliğəli olsa da, tank əleyhinə minaya bənzədilir. Bu mina heç bir təqsiri olmayan yol hərəkəti iştirakçısının da həyatına son qoya bilər.

Vüqar