Alkoqolsuz içkilərin istehsalı müəssisəsində nöqsanlar aşkarlanıb - FOTO

Bakının Suraxanı rayonunda Aşıq Pəri küçəsi, 303A ünvanında fəaliyyət göstərən alkoqolsuz içkilərin emalı müəssisəsində aparılan planlı yoxlama zamanı qida təhlükəsizliyi sahəsində normativ hüquqi aktların, sanitariya norma və qaydalarının tələblərinin pozulduğu müəyyənləşdirilib.

Bu barədə Avtosfer.az-a Qida Təhlükəsizliyi Agentliyinin İnformasiay təminatı və innovativ həllər şöbəsindən məlumat veriblər.

Yoxlama zamanı müəssisədə texnoloji ardıcıllıq prinsipinə və temperatur rejiminə əməl edilmədiyi, məhsulların etiketlənməsi zamanı qanunvericiliyin tələblərinə riayət edilmədiyi, işçilərin dövri tibbi müayinədən keçmədiyi və xüsusi geyimlə təmin olunmadığı məlum olub. Eyni zamanda şadlıq saraylarından geri yığılmış butulkaların yuyulduqdan sonra istifadə olunduğu müəyyən edilib.

Sınaq məqsədi ilə məhsullardan nümunələr götürülərək Qida Təhlükəsizliyi İnstitutunun müvafiq laboratoriyasına təqdim edilib. Sınaq protokoluna əsasən məhsulun göstəricilərinin texniki normativ hüquqi sənədlərin tələblərinə uyğun olmadığı müəyyənləşdirilib.

Faktla bağlı müəssisə rəhbərliyi barəsində inzibati xəta haqqında protokol tərtib edilib, qanunvericiliyə uyğun müvafiq tədbirlər görülüb.