![Bakıda avtomobil səkiyə çırpılıb, xəsarət alan var - FOTO](/upload/news/small/1903206.jpeg)
Bakıda narkoman sürücü 5 maşını əzdi; - POLİS ATƏŞ AÇIB SAXLADI
![Bakıda narkoman sürücü 5 maşını əzdi; - POLİS ATƏŞ AÇIB SAXLADI](/upload/news/2035158.jpg)
Səbail rayonunda gecə saatlarında tabesizlik göstərən yük maşını polis əməkdaşları tərəfindən silahdan atəş açılaraq dayandırılıb.
Bu barədə məlumat sosial şəbəkələrdə və bəzi kütləvi informasiya vasitələrində paylaşılıb.
İddia edilir ki, sürücü “Mercedes-Benz” markalı yük maşınını narkotik vasitənin təsiri altında idarə edib. Polisin “saxla” əmrinə tabe olmayan sürücü yolda zəncirvari qəzanın yaşanmasına səbəb olub. İlkin məlumatlara görə, hadisə zamanı 3-dən çox nəqliyyat vasitəsi toqquşub və avtomobillərə maddi ziyan dəyib.
Faktı Avtosfer.az-a Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli təsdiq edib. O bildirib ki, hadisə dünən gecə saatlarında baş verib:
“1983-cü il təvəllüdlü əvvəllər məhkumluq həyatı yaşamamış, Səbail rayon sakini Muradov Yaşar Əli oğluna idarə etdiyi yük avtomobili ilə yolayrıcını keçmə qaydasını pozduğuna görə Səbail Rayon Dövlət Yol Polisi Şöbəsinin əməkdaşları tərəfindən “saxla” əmri verilib. Onu da qeyd edim ki, polisə tabesizlik göstərərkən yaxınlıqdakı 5 avtomobilə ziyan vurub. Bu səbəbdən yol polisi əməkdaşları şəxsin saxlanılması üçün silahdan istifadə etmək məcburiyyətində qalıblar. Atəşlə avtomobilin arxa təkərlərini partladıblar və sürücünü saxlayıblar.
Saxlanılarkən şəxsin anlaqsız vəziyyətdə, sərxoş olduğu məlum olub. Şəxsdən kəskin spirt qoxusu gəlib. O, yol polisinə tabe olmadığı üçün əraziyə dəstək üçün post patrul xidmətinin əməkdaşları cəlb edilib. Şəxs saxlanıldıqdan sonra həkim müayinəsinə aparılıb. Məlum olub ki, o, nəinki alkoqollu içkinin təsiri altındadır, həm də narkotik vasitə qəbul edib. Şəxs barəsində protokol tərtib edilib və zəruri araşdırmalar aparılır”.
Faktla bağlı cinayət işi başlanılıb istintaq hərəkətləri aparılır.