Bakıda yola dizel yanacağının dağılması qəzalara səbəb olub - VİDEO

Bakıda yola dizel yanacağının dağılması bir neçə qəzaya səbəb olub.

Avtosfer.az-ın məlumatına görə, hadisə bu gün günorta saatlarında paytaxtın Xətai rayonu, ''NZS'' qəsəbəsində baş verib. Süleyman Əhmədov küçəsində yanacaq daşıyan avtomobilin çənindəki kranda nasazlıq yarandığından dizel yola dağılıb. Sürücü bundan xəbərsiz olduğundan yüzlərlə metr gedib. Ətrafda olanların müdaxiləsi ilə həmin nəqliyyat vasitəsi saxlanıb və yanacağın yola tökülməsinin qarşısı alınıb. Amma dizelin yola dağılması böyük təhlükəyə səbəb olub. Bundan xəbərsiz olan digər sürücülər təhlğükəli anlar yaşayıblar. Hətta bir neçə yüngül qəza da baş verib. Sürücülər yolda hərəkətin çətinləşdiyini deyiblər. Sürət azaldığından yolda sıxlıq da yaranıb. Ərazidə olanların verdiyi məlumatdan sonra hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin yanğınsödürən avtomobili və canlı qüvvəsi gəlib. Fövqəladə Hallar Nazirliyindən verilən məlumata görə, yanacaq daşıyan avtomobildən yolun hərəkət hissəsinə təqribən 250 metr məsafədə dizel dağılıb. Hadisə yerinə cəlb olunmuş yanğınsöndürmə qüvvələri tərəfindən yol yuyularaq müvafiq təhlükəsizlik tədbiri görülüb. Bundan sonra yolda hərəkət normallaşıb.