Bu tikinti şirkətində nöqsanlar aşkarlanıb, yarım milyonluq vergi borcu yığılıb

"1ST Construction" inşaat şirkətinin statistik məlumatların verilməsi qaydalarını pozduğu məlum olub.

Dövlət Statistika Komitəsi şirkətin fəaliyyətində nöqsan aşkarlayıb.

Buna görə də "1st Construction" barəsində İnzibati Xətalar Məcəlləsinin 389-cu maddəsinə əsasən cərimə protokolu tərtib edib.

Protokol tərtib olunan maddədə deyilir ki, statistik müşahidələrin aparılması üçün zəruri olan məlumatların təqdim edilməməsinə və ya vaxtında təqdim edilməməsinə, yaxud hesabatların təhrif edilməsinə görə üç yüz manatdan beş yüz manatadək məbləğdə cərimə edilir.

Protokol Nəsimi Rayon Məhkəməsində hakim Babək Pənahovun sədrliyi ilə araşdırılacaq.

Qeyd edək ki, "1st Construction" inşaat şirkətinin əvvəlki adı "Gilan İnşaat" olub. Şirkət iki il əvvəl adını və qanuni təmsilçisini dəyişib. Həmçinin "1st Construction" inşaat şirkətinin hazırda Dövlət Vergi Xidmətinə vergi borcu da yığılıb. Vergi borcunun bu günə olan həcmi 463 488,64 manatdır.

Xatırladaq ki, "Gilan" adı ilə fəaliyyət göstərən şirkətlər daha əvvəl fövqəladə hallar naziri Kəmaləddin Heydərovun ailə üzvlərinə məxsus olan "Gilan Holdinq"ə bağlı olublar. Sonradan holdinqə daxil "Gilan" adlı şirkətlərin əksəriyyətinin adı dəyişdirilib.