Lənkəranda mağazada partlayış: Xəsarət alan var - YENİLƏNİB

Lənkəran rayonunun Şovu kəndində partlayış baş verən marketin xəsarət alan sahibi Mahir Cəbrayılovun vəziyyəti ağırdır.

Avtosfer.az-ın məlumatına görə, partlayış nəticəsində sahibkar iki qolu, sifəti və baş nahiyəsindən ağır yanıq xəsarətləri alıb.
Lənkəran şəhər Mərkəzi Xəstəxanasının reanimasiya şöbəsinə yerləşdirilən M.Cəbrayılova tibbi yardım göstərilsə də, xəsarətlərin ağırlığı nəzərə alınaraq onun Bakıya köçürülməsi qərara alınıb. M.Cəbrayılov təcili tibbi yardım briqadası ilə Bakı Yanıq Mərkəzinə köçürülüb.

***14:09
Lənkəranda partlayışda bir nəfər xəsarət alıb.

Avtosfer.az unikal-a istinadən xəbər verir ki, hadisə Lənkəran rayonunun Şovu kəndində mağazaların birində baş verib. İş yerinə gələn kənd sakini, mağazanı işlədən Mahir Cəbrayılov qapını açıb içəri daxil olub və elektrik avadanlıqlarını işə salıb. Bu zaman mağazada partlayış baş verib. Partlayış o qədər güclü olub ki, mağazanın qapılarını yerindən çıxarıb, tavanı dağıdıb, şüşələri qırıb.

Partlayış zamanı mağazada olan M.Cəbrayılov müxtəlif dərəcəli bədən xəsarətləri alaraq Lənkəran Rayon Mərkəzi Xəstəxanasının təcili yardım şöbəsinə hospitalizasiya olunub. Vəziyyətinə uyğun olaraq reanimasiya şöbəsinə yerləşdirilib. 

Partlayışa soyuduculardan birinin qaz balonunun sıradan çıxmasının səbəb olduğu bildirilir. Kənd sakinləri deyir ki, mağazanın qarşısından qaz kəməri keçir, ola bilər ki, kəmərdə sızma olsun.

Fakt üzrə araşdırma davam etdirilir.