Özüylə yanaşı “Prius”u da təhlükəyə atdı - VİDEO

Magistral yolda qaçaraq keçməyə çalışdı, avtomobilin hədəfindən saniyə ilə qurtulmağı bacardı.
Avtosfer.az xəbər verir ki, hadisə paytaxtın mərkəzi küçələrindən birində baş verib. Yolun müşahidə kameralarına düşən görüntülərə bir müddət baxdıqdan sonra yolda şütüyən avtomobillərə məhəl qoymayan piyadanı görürük. Avtomobilini yolun kənarında saxlayaraq düşən sürücü maşınların hərəkətini müşahidə etdikdən sonra yolun sağ istiqamətində gedən avtomobillərə baxaraq digər tərəfə keçməyə cəhd edib. Sağ tərəfdə duran avtomobillərə baxmaqla kifayətlənərək sürətini artıran şəxs sol istiqamətdə gedən maşınları gözə almaması diqqətdən qaçmır. Nəticədə yüksək sürətlə irəliləyən “Toyota Prius” markalı avtomobilin qarşısından keçən piyada şanslı çıxaraq saniyə ilə qurtulmağı bacarıb. Təbii ki, günah “Prius”da olmasa da, sürücü avtomobilini saxlayıb və piyada ilə ünsiyyət qurmağa çalışıb. 
Təəssüf hissi ilə qeyd edək ki, son zamanlar piyadaların tələskənliyi və canlarını riskə ataraq yolu keçməyə çalışmaları geniş yayılıb. Lakin hər insan da videodakı şəxs kimi mövcud qəzadan yan keçərək şanslı çıxmır. Məhz bu səbəbdən yolu keçərkən ikiqat ehtiyatlı davranmaq və öncədən yolun sağ və sol tərəfinə baxmaq lazımdır. 

Nərmin Əkbər