Sürücülər yolun ortasında “Qaydasız döyüş”ə çıxdı - VİDEO

Əsəblərini cilovlaya bilməyən sürücü digər avtomobilin sahibi ilə əlbəyaxa olub.
Dağıstanın paytaxt küçələrindən birində baş verən qeyri-adi hadisə sosial medianın gündəmində yer alıb.
Avtosfer.az xəbər verir ki, həvəskarın çəkdiyi görüntülərin başlanğıc hissəsi qeydə alınmasa da hadisə şahidləri olayın necə “kick boks” meydançasına çevrildiyini vurğulayıblar. Aqressiyasına uduzan “əsəbi sürücü” maşınına yol verməyən digər sürücünü “ring”ə çağırıb. Daha sonra bununla da ürəyi soyumayan sürücü soyunaraq yolun ortasında şou göstərməyə başlayıb. Hətta aranı sakitləşdirməyə gələn şəxsə də şiddət göstərərək “döyüşməyə” davam edib. Sakitləşməyən “qəhrəman” sonda polislərin hadisə yerinə cəlb olunmasıyla əməlinə son verib. Dindirilmə zamanı qarşıdakının onu “cindən-dondan çıxartdığını” və davranışının qarşıdakına layiq hərəkət olduğunu qeyd edib.
Nəticədə onun sürücülük vəsiqəsi bir aylıq əlindən alınıb və maşını müsadirə olunaraq cərimələnib.

Nərmin Əkbər