Müsəlman ölkəsində ilk dəfə: pivə ixracına rəsmi lisenziya verildi - FOTO

Müsəlmanlara spirtli içki satışının qadağan edildiyi Pakistanın tarixində ilk dəfə yeganə pivə zavodu ixrac lisenziyası alıb. 

Avtosfer.az xəbər verir ki, “Murree” pivə zavodunu 1860-cı ildə ingilislər əsgərlərin ehtiyacını ödəmək üçün tikiblər. O vaxtdan müəssisə bir atəşpərəst ailənin əlindədir. 

Ölkənin qurucu lideri Məhəmməd Əli Cinnah spirtli içki həvəskarı idi. Pərviz Müşərrəf viskini sevirdi. 1977-vi ildə islamçı seçicilərin səsini almaq üçün spitrli içkini qadağan edən Zülfüqar Bhutto da içdiyini etiraf edib.

2007-ci ildə bir Çin şirkəti burada işləyən çinlilərə satmaq üçün pivə istehsalına başlayıb.

Pakistanda formal olaraq müsəlmanlara içki satışı qadağandır. İçmək istəyən müsəlmanlar bunun üçün hinduların və xristianların köməyindən istifadə edirlər. 

Qeyd edək ki, müsəlman ölkələrində son illərdə spirtli içki ilə bağlı qaydalar umşaldılır. Səudiyyə ərəbistanında ötən ay 2 alkoqol satışı mağazası açılıb. Burada hələlik əcnəbilər alver edə bilir. Yumşalma 2030-cu ildə keçiriləcək böyük idman tədbirlərinə hazırlıq məqsədi daşıyır. 
Bir neçə il əvvəl Mərakeşin baş müftisi fətva vermişdi ki, “xurmadan çəkilən araq haram deyil”.

Alkoqolun qadağan olunduğu müsəlman ölkələrində hər il saxta spirtli içkilərdən yüzlərlə insan həyatını itirir. Bu xüsusda İran və Pakistan xüsusi seçilir. Lakin, sərt qadağalar nəyinsə qarşısını almır, əksinə qeyri-leqal spirtli içki ticarətini genişləndirir. Məsələn, Qərb mətbuatı Səudiyyədə 1 şüşə viskinin orta qiymətinin 600 dollar olduğunu yazır. 

PS. Vaxtilə böyük alman filosofu Karl Marks fransız kürəkəni Pol Lafarqa məktubunda yazırdı ki, “təqib etmək, arzuolunmaz meylləri gücləndirmək üçün ən yaxşı vasitədir”. 

Elə spirtli içkilərin sərbəst satıldığı Azərbaycanda Türkiyə və ya İrandakı kimi onlarla insanın ölümünə səbəb olan kütləvi alkoqol intoksikasiyaları baş vermir.

Vüqar