Tarixdəki ən qədim samovar - FOTOLAR

Biz samovarların adətən latundan, bəzən də gümüşdən hazırlandığını görmüşük. Həm də çoxumuz samovarın rus mədəniyyətindən gəldiyini düşünürük. Doğrudur, rusların bu məişət əşyasının kütləviləşməsində rolu danılmazdır. Lakin, başlanğıc Azərbaycan xalqına aiddir.

Avtosfer.az xəbər verir ki, təmirdən sonra Leyla və Arzu Əliyevanın iştirakı ilə açılan Şəki Tarix Diyarşünaslıq Muzeyi tam müasir standartlara uyğundur. Bir neçə il əvvələdək bina uçulub tökülürdü, saxlama şəraiti yumşaq desək, yaxşı deyildi. İndi vəziyyət başqadır. Bərpa ilə yanaşı, ekspozisiya da zənginləşib.

Burada diqqəti cəlb edən eksponatlardan biri gildən hazırlanmış samovardır. 1989-cu ildə Şəkidə tapılan samovarın 3600 yaşı var.

Hazırlanma texnologiyası piti qabı kimidir. Lakin, bu samovar indikilərdən fərqli olaraq həm içəridən, həm də çöldən qızdırılır.

Məlumata görə bu, dünyada məlum olan ən qədim samovardır. Təqdirəlayiq haldır ki, ekspozisiyada eksponatın müasir replikası da yer alır. Bu da məişət alətinin quruluşu və iş prinsipini daha yaxşı anlamağa imkan verir.

Samovar həm də buranın ilkin və əbədi sakinləri olan Azərbaycan xalqının necə qədim mədəniyyətə sahib olduğunu göstərir.

Vüqar