Martın 16-da saat 16 radələrində Ağdam rayonunun işğaldan azad olunmuş ərazisində olarkən piyada əleyhinə minaya düşənlərdən ikisi müalicə üçün Bakıya göndərilib.

Bu barədə Oxu.Az-a həkim-travmatoloq-ortoped Ayxan Bayramov məlumat verib.

O bildirib ki, Hüseynov Akif Muxtar oğlu gecə saatlarında xəstəxanaya daxil olub:

“Ağdam rayonu, Yusifcanlı kəndi ərazisində mina partlaması nəticəsində xəsarət alıb. Sağ baldır sümüklərinin, pəncə sümüklərinin açıq sınığı, sol pəncənin hər iki topuğunun sınığı var. Xəstənin ümumi vəziyyəti orta ağırdır. Hazırda tibbi yardım göstərilir”.

Qeyd edək ki, Ağdam rayonunun Əfətli kənd sakinləri - 1985-ci il təvəllüdlü Bəhruz Nadir oğlu Abdulov hər iki gözündən zədə aldığı üçün Akademik Zərifə Əliyeva adına Milli Oftalmologiya Mərkəzinə göndərilib.

Xatırladaq ki, martın 16-da saat 16 radələrində Ağdam rayonunun Əfətli kəndində yaşayan Hüseynov Akif, oğlanları Razi, Bayram, Anar və qonşuları Bəhruz Abdulov Yusifcanlı kəndi ərazisindəki qəbiristanlıqda dəfn edilmiş yaxınlarının məzarını ziyarət etmək məqsədi ilə kənar şəxslərin girişinə məhdudiyyət qoyulmuş və minalardan təmizlənməmiş əraziyə daxil olarkən minaya düşüblər.

Faktla bağlı cinayət işi başlanılıb, istintaq aparılır.