“Azərbaycan Xəzər Dəniz Gəmiçiliyi” Qapalı Səhmdar Cəmiyyətinin Müşahidə Şurasının 2021-ci il üzrə növbəti iclası keçirilib.

Avtosfer.az xəbər verir ki, iclasda Müşahidə Şurasının üzvləri ilə yanaşı “Azərbaycan Xəzər Dəniz Gəmiçiliyi” QSC-nin İdarə Heyətinin üzvləri də iştirak ediblər.

İclasda “Azərbaycan Xəzər Dəniz Gəmiçiliyi” QSC-nin 2021-2030-cu illəri əhatə edən Strategiyası, gəlir və xərclər smetasına düzəlişlərin edilməsi, habelə Cəmiyyətin fəaliyyətinin əsas səmərəlilik göstəricilərinin təsdiqi və digər cari məsələlər müzakirə olunub.

Müşahidə Şurası tərəfindən “Azərbaycan Xəzər Dəniz Gəmiçiliyi” QSC-nin 2021-2030-cu illəri əhatə edən Strategiyası ümumən dəstəklənib və sözügedən strategiyanın təfərrüatlı şəkildə Müşahidə Şurasının Strategiya və İnvestisiyalar komitəsində müzakirə edildikdən sonra Müşahidə Şurasının təsdiqinə verilməsi qərara alınıb.

Cəmiyyətin gəlir və xərclər smetasına düzəlişlərin edilməsi və əsas səmərəlilik göstəricilərinin təsdiqi məsələsinin isə müvafiq olaraq Azərbaycan Respublikası Nazirlər Kabinetinin 2016-cı il 30 dekabr tarixli 534 nömrəli “İri dövlət şirkətlərinin gəlirlər və xərclər smetaları haqqında” Qərarı və 2019-cu il 4 iyun tarixli 257 nömrəli “Paylarının (səhmlərinin) nəzarət zərfi dövlətə məxsus olan hüquqi şəxslərin fəaliyyətində səmərəliliyin artırılması ilə bağlı bir sıra normativ hüquqi aktların təsdiq edilməsi haqqında” Qərarı ilə təsdiq edilmiş müvafiq qayda ilə uzlaşdırılması və bununla əlaqədar Azərbaycan İnvestisiya Holdinqinin Müşahidə Şurasında müvafiq müzakirələr aparılaraq Nazirlər Kabinetinə təkliflərin təqdim edilməsi qərara alınıb.

Müşahidə Şurasında “Azərbaycan Xəzər Dəniz Gəmiçiliyi” QSC-nin digər cari məsələləri ilə bağlı da geniş müzakirələr aparılaraq müvafiq qərarlar qəbul olunub.