Azərbaycanda ötən il beynəlxalq avtodaşımalar üzrə 97 min icazə verilib

Ötən il Azərbaycanda beynəlxalq avtomobil daşımalarını həyata keçirən yerli avtodaşıyıcılara 97 min “İcazə” blankı verilib və bundan dövlət büdcəsinə 3,5 mln. manat dövlət rüsumunun ödənilməsi təmin edilib.

Avtosfer.az-ın məlumatına görə, bu, Nazirlər Kabinetinin 2020-ci ildə fəaliyyəti haqqında icmal hesabatda əksini tapıb.

“Həmçinin Beynəlxalq Nəqliyyat Forumunun 1 200 çoxtərəfli (illik) və 240 çoxtərəfli (aylıq) icazələrinin daşıyıcılara verilməsi təmin edilib”, - hesabatda vurğulanır.

Hesabata əsasən, 2020-ci ildə beynəlxalq avtomobil daşımalarının həyata keçirilməsi üçün xarici ölkələrə 155325 ədəd giriş-çıxış və tranzit keçid üçün, 16060 ədəd 3-cü ölkəyə daşımalar üçün, 1200 ədəd beynəlxalq sərnişin daşımaları üçün “İcazə” blankları verilib.

“2020-ci il ərzində 112406 ədəd fərqlənmə nişanı verilib, 34 istiqamət üzrə sərnişindaşıma fəaliyyəti həyata keçirilən müntəzəm beynəlxalq avtobus marşrutlarının rəsmiləşdirilməsi təmin olunub”, - hesabatda qeyd edilir.