Bakı Limanı “Silkway” adlı gəmini əsaslı təmir edəcək

“Bakı Beynəlxalq Dəniz Ticarət Limanı” QSC “Silkway” adlı gəminin əsaslı təmir xidmətinin satın alınması üçün açıq tender elan edib.

Avtosfer.az xəbər verir ki, zərflərin təqdim edilməsi üçün son tarix 2024-cü il aprelin 3-ü saat 17:00-dəkdir. Göstərilən vaxtdan gec təqdim olunan zərflər açılmadan geri qaytarılacaq.

Müsabiqədə iştirak etmək istəyən şəxslər “www.portofbaku.com” səhifəsinə daxil olmaqla elanlar bölməsindən əlavə sənədləri və ətraflı məlumatı əldə edə bilərlər.

Qeyd edək ki, Bakı Beynəlxalq Dəniz Ticarət Limanı 1902-ci ildən fəaliyyət göstərən Bakı Limanının bazasında 2015-ci ildə yaradılıb. Onun nizamnamə kapitalı 16 min manat təşkil edir. Liman yük, neft və bərə terminallarından ibarətdir.

14 may 2018-ci il tarixindən Prezident İlham Əliyevin iştirakı ilə açılışı olmuş yeni Bakı Limanının 1-ci fazada yükaşırma potensialı 15 milyon ton, o cümlədən 100 min TEU konteyner təşkil edir. İkinci fazanın yekunlaşdırılmasından sonra Bakı Limanından ildə 25 milyon tona qədər yük aşırılacaq, 500 min TEU konteyner keçə biləcək.