Bakıda “təyyarə sürəti ilə” hərəkət edən maşına MMX protokol gəldi– FOTO

Bakıda Dövlət Yol Polisinin elektron protokolu sürücünü təəccübləndirib. Avtosfer.az oxu.az-a istinadən xəbər verir, Bilgəh-Nardaran-Pirşağı yolunda avtomobil sürət həddini aşdığı üçün sürücüyə maraqlı elektron  protokol gəlib. Belə ki, protokola baxanda məlum olur ki, qeyd edilən yolda Kürdəxanı istiqamətində hərəkət edərkən maksimal sürət 110 km/saat olduğu halda, avtomobil 623 km/saat sürətlə idarə edilib. Məsələ ilə bağlı Bakı şəhər Dövlət Yol Polisi İdarəsinin mətbuat xidmətinin rəhbəri Vaqif Əsədov bildirib ki, Azərbaycanda 623 km/saat sürətlə hərəkət edən avtomobil olmadığından bu texniki səhvdir: “Həmin elektron protokolda texniki səhv baş verib. Sürücü məsələnin həlli ilə bağlı DYP idarəsinə müraciət etməlidir”.

Qeyd edək ki, 623 km/saat təxminən təyyarənin uçuş sürətinə bərabərdir.