Beş aeroportda işçiləri tətilə başlayıb

Almaniyanın beş aeroportunun təhlükəsizlik şöbəsinin əməkdaşları iş şəraitinin yaxşılaşdırılması tələbi ilə tətilə başlayıblar.

“Report” xəbər verir ki, etiraz aksiyaları Hamburq, Ştutqart, Karlsrue/Baden-Baden, Köln və Berlin hava limanlarını əhatə edir.

Tətil bütün günü davam edəcək və bu, on minlərlə sərnişinin planlarını pozacaq. Tətil səbəbindən ümumilikdə 580-dən çox reysin ləğv olunacağı ehtimal edilir.

Bundan əlavə, cümə günü Almaniyanın digər şəhərlərində - Hannover, Dortmund, Drezden, Leypsiq, Vetsedə, eləcə də yenidən Karlsrue/Baden-Baden hava limanında işçilər tətil edəcəklər.

Eyni zamanda Həmkarlar ittifaqı Münhen hava limanında yük nəzarəti departamentinin əməkdaşlarını cümə axşamı yerli vaxtla saat 04:00-dan martın 15-i saat 06:00-a qədər tətil etməyə çağırıb. Bu aksiya əsasən aviadaşımalara təsir göstərəcək.

Həmkarlar İttifaqı təxminən 25 min adamın iş şəraitinin yaxşılaşdırılması ilə bağlı razılığa gəlməyə çalışır, danışıqların əvvəlki 5 mərhələsi nəticəsiz qalıb.