Biləcəri sakinlərindən etiraz: “Sağlamlığımıza yeni təhlükə mənbəyi yaranır” - VİDEO

Xəbərlər 4 İyul 2020 15:15 Oxunub 2544
Biləcəri sakinlərindən etiraz: “Sağlamlığımıza yeni təhlükə mənbəyi yaranır” - VİDEO
WhatsApp kanalımıza abunə ola bilərsiniz

Binəqədi rayonu, Biləcəri qəsəbəsi, Məmməd Səid Ordubadi küçəsinin sakinləri qəsəbədə yaranmış gigiyenik problemlərlə üz-üzə qalıblar. 

Avtosfer.az xəbər verir ki, hazırda həmin ərazidə yerləşən “Məmmədoğulları” ASC-nin servis yerlərindən axıdılan kanalizasiya və çirkab suları yaşayış zonasının yaxınlığından keçir.

Bununla bağlı bir neçə dəfə müvafiq qurumlara, o cümlədən Binəqədi Rayon İcra Hakimiyyətinə müraciət edilsə də, təəssüf ki, indiyədək heç bir tədbir görülməyib.

Sakinlər deyir ki, yaşayış zonasında azyaşlı uşaqlar gəzir, kanalın yaratdığı üfunət və antisanitariya vəziyyəti onların başqa yerdə oynamasına alternativ qoymur.

Sakinlər isti yay günlərində ərazidə zəhərli ilanların hərəkət etdiyinə şahid olduqlarını deyirlər.

Biləcəriyə gedən əsas yolun kənarından sakinlərin yaşadığı əraziyə daxil olarkən, mal-qara saxlayanların peyin tullantılarını yolun düz kənarına atması ətrafda dəhşətli üfunət qoxusunun yayılmasına səbəb olur.

Belə acınacaqlı vəziyyət sakinlərin sağlamlığı üçün gələcəkdə daha ciddi fəsadlara yol aça, müxtəlif infeksion xəstəliklərin yayılmasına səbəb ola bilər. Ona görə də, kanalın birdəfəlik ləğv olunması sakinlərin əsas tələblərindən biridir.

Sakinlər yaranmış acınacaqlı vəziyyətin tezliklə aradan qaldırılması üçün Prezident İlham Əliyevə və Birinci vitse-prezident Mehriban Əliyevaya müraciət ediblər:

“Çox hörmətli cənab Prezident İlham Əliyev və Birinci vitse-prezident Mehriban Əliyeva,

Biz sakinlər hər zaman sizi dəstəkləmişik və bu, dəyişilməz olaraq qalacaq. Binəqədi sakinləri olaraq sizin rəhbərliyiniz altında ölkəmizdə görülən abadlıq və quruculuq işlərindən razıyıq. Sizə müraciət edərək bildiririk ki, koronavirusla əlaqədar ölkəmizdə görülən karantin tədbirləri dövründə bir sıra məmurlar və şəxslər sizin yürütdüyünüz siyasətə xələl gətirməyə çalışırlar. Bu gün yüzlərlə sakinin yaşadığı bu əraziyə “Məmmədoğulları” ASC-nin servis yerlərindən kanalizasiya və çirkab suları axıdılır. Nəticədə, bizim və azyaşlı uşaqlarımızın sağlamlığına yeni təhlükə mənbəyi yaranır. Özü də bu təhlükə Bakının mərkəzinə yaxın ərazisində yaranıb.

Sizdən yeganə xahişimiz odur ki, üzləşdiyimiz bu acınacaqlı vəziyyətdən tezliklə xilas olmağımız üçün öz köməkliyinizi göstərəsiniz. Ümidimiz ancaq Sizədir!”

Ərazidən görüntüləri təqdim edirik:

 

ŞƏRH YAZ
Ad

E-mail

Şərh