“Boeing” boltları bərkidilməyən təyyarələrə görə proqram menecerini işdən çıxartdı

“Boeing” şirkəti “737 MAX” təyyarə proqramının menecerlərindən birini işdən çıxarıb.

Avtosfer.az xəbər verir ki, “737 MAX” proqramının vitse-prezidenti və ABŞ-ın Renton şəhərindəki yekun montaj zavodunun baş meneceri Ed Klark tutduğu vəzifədən uzaqlaşdırılıb. Onu Kommersiya Hava Yolları Departamentinin vitse-prezidenti Keti Rinqqold əvəzləyib.

Şikətdən verilən məlumata görə, kadr dəyişiklikləri istehsal olunan təyyarələrin keyfiyyətinə və təhlükəsizliyinə diqqəti artırmaq məqsədi daşıyır.

Qeyd edək ki, yanvar ayında Alyaska Hava Yollarına məxsus “737 MAX 9” təyyarəsi Portlend hava limanında məcburi eniş edib. Buna səbəb uçuş zamanı təzyiqin azalması və gövdənin bir hissəsinin qapı ilə birlikdə çıxması olub. Bu tipli təyyarələrin uçuşları dayandırılıb və yoxlamalara başlanılıb. Daha sonra təyyarələrdə boltların boş olduğu, yerinə yaxşı bərkidilmədiyi aşkarlanıb.

Məhəbbət Tərlanoğlu