Bolqarıstan və Rusiya Ukrayna helikopterinin təmirinə görə qarşı-qarşıya gəlib

Moskvanın yerli şirkətlərə Rusiya istehsalı helikopterlərin təmirinə verilən icazələri dayandırmaq qərarı Bolqarıstanın müdafiə qabiliyyətinə ciddi təsir göstərməyəcək. Ordu.az xəbər verir ki, bunu Bolqarıstan müdafiə naziri Draqomir Zakov bildirib.

O, Bolqarıstanın Ukrayna hərbi texnikasının təmirini davam etdirəcəyini bildirib.

Rusiya Xarici İşlər Nazirliyinin sözçüsü Mariya Zaxarova NATO və Avropa İttifaqına üzv ölkələrin Ukraynaya silah və hərbi texnika tədarük etdiyini və onların Şərqi Avropadakı zavodlarda təmirini planlaşdırdıqlarını bildirib. O, buna cavab olaraq qeyd edib ki, Rusiya iki Bolqarıstan şirkətinə və bir Çex firmasına Rusiya istehsalı olan helikopterlərin təmiri və texniki xidmətini həyata keçirmək üçün icazəni dayandırır.

Bu isə o deməkdir ki, Rusiya artıq ehtiyat hissələri təmin etməyəcək.

Bolqarıstan əvvəllər birbaşa silah göndərməkdən imtina etsə də, öz hərbi zavodlarında Ukrayna hərbi texnikasını təmir etməyə razılıq verib.

Zakov bildirib ki, Moskvanın bu qərarı Bolqarıstana ciddi təsir etməyəcək və onun Ukrayna hərbi texnikasının təmirinə mane olmayacaq.