Bura maye qazdoldurma məntəqəsi imiş - VİDEO

FHN daha bir maye qazdoldurma məntəqəsinin istismarını dayandırıb.

Avtosfer.az xəbər verir ki, nazirliyin Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin müfəttişləri tərəfindən Qazax rayonunun Xanlıqlar kəndində fəaliyyət göstərən fərdi sahibkar Bədəlov Vidadi Məmməd oğluna məxsus maye qazdoldurma məntəqəsində plan üzrə yoxlama aparılıb.

Yoxlama zamanı məntəqədə insan həyatı və sağlamlığı üçün təhlükə yarada biləcək pozuntular aşkarlanıb.

Belə ki, maye qazdoldurma məntəqəsində istismar olunan maye qaz tutumunun istismar müddətinin bitdiyi, tam texniki müayinəsinin aparılmadığı, tutumun üzərində quraşdırılmış qoruyucu klapanların dövri yoxlanılmasının keçirilmədiyi, həmçinin tutumun üzərində quraşdırılmış manometrlərin iş prosesində yoxlanılmadığı müəyyən edilib.

Aşkar olunmuş nöqsanların dərhal aradan qaldırılmasının mümkün olmadığı, eləcə də insan həyatı və sağlamlığı üçün yaratdığı təhlükə nəzərə alınaraq, maye qazdoldurma məntəqəsinin istismarı agentliyin əməkdaşları tərəfindən dayandırılıb və pozuntuların aradan qaldırılması üçün tərtib olunmuş aktın bir nüsxəsi sahibkara təqdim edilib.