"Buta Airways" qayıdış biletlərinin yarı qiymətini qaytarmır

Azərbaycan Respublikasının dövlət sərhədində giriş-çıxışa tətbiq olunan məhdudiyyət 15 iyun 2020-ci il tarixinədək uzadıldı.

Bu zaman sözügedən tarixlərə ölkə xaricinə uçuş bileti olan şəxsləri ən çox biletlərin qaytarılması və dəyişdirilməsi məsələsi maraqlandırır. "Azərbaycan Hava Yolları" QSC (AZAL) və onun aşağı büdcəli törəməsi "Buta Airways" aviaşirkətləri müvafiq olaraq iyulun 1-nə qədər uçuş tarixi ilə aviabiletlərin ödənişsiz təxsis edilməsi müddətinin uzadıldığını açıqladı. Pul vəsaitinin qaytarılması, aviaşirkətin fəaliyyəti bərpa olunduqdan sonra 60 gün ərzində həyata keçirilir.

Bəzi bilet sahibləri isə 1 iyul tarixinə qədər olan uçuş biletlərinin dəyişdirilə və qaytarıla bildiyi halda, bundan sonrakı tarixə olan qayıdış biletlərinin qaytarılması üçün cərimə tətbiq olunduğunu bildirir. Vətəndaşları maraqlandıran sual isə xarici ölkəyə səyahət edə bilmədikləri halda qayıdış biletlərinin niyə qaytarılmamasıdır.

"MediaPost" xəbər verir ki, Taleh Əliyev adlı Bakı sakini eyni problemlə bağlı narazılığını dilə gətirib: ""Buta Airways"dən 26 iyun və 2 iyul üzrə müvafiq olaraq gediş-gəliş biletim var. Son qərarlarına əsasən 1 iyula qədər olan biletleri ödənişsiz əsaslarla geri qaytarırlar. Mən müraciət etdikdə deyildi ki, 2 iyul tarixindəki qayıdış bileti 50% cərimə ilə qaytarıla bilər. Əgər mən 26 iyun tarixində gedə bilmirəmsə, 2 iyulda oradan necə qayıda bilərəm?"