Cəlilabad rayonunda 14 kəndi birləşdirən magistral yol qəzalı vəziyyətdədir.

Bu barədə Report-a kənd sakinləri məlumat verib.

Onların sözlərinə görə, 14 kəndi birləşdirən Qarazəncir-Qarakazımlı-Bayxanlı avtomobil yolu dağılmaq təhlükəsi ilə üz-üzədir:

"Bu yol bir neçə il öncə istismara verilib. Amma yolun təxminən 20 km-lik hissəsi yararsız vəziyyətdədir. Yolda əmələ gələn iri çartlar, çalalar və qoyulan aldadıcı yamaqlar tez-tez bizə problem yaradır. Yağışda, qarda bu yolda hərəkət daha da çətinləşir, texnikanın hərəkətində problem yaranır. Biz də istərdik ki, rahat gedək-gələk, nəqliyyat vasitələrinin hərəkətində problem olmasın".

Problemlə bağlı Azərbaycan Avtomobil Yolları Dövlət Agentliyindən bildirilib ki, bu yol artıq regionların sosial-iqtisadi inkişafı dövlət proqramına salınıb.

Qeyd edək ki, ümumi uzunluğu 34 km, eni 8 metr olan yol 4-cü texniki dərəcəyə aiddir və gündəlik olaraq 20 mindən çox əhali bu yoldan istifadə edir.