Ermənistan gömrüyü Azərbaycanla sərhədləri açmağa hazırdır

Ermənistanın Dövlət Gəlirləri Komitəsi Türkiyə və Azərbaycanla sərhədlərin açılması halında bütün ssenarilərə hazırdır. 

Avtosfer.az xəbər verir ki, bu barədə Ermənistanın Dövlət Gəlirləri Komitəsinin rəhbəri Eduard Akopyan parlamentdə jurnalistlərə bildirib.

"Bizim vəzifəmiz istənilən ssenari üzrə gömrük nəzarətini təşkil etməkdir. Əgər söhbət kommunikasiyaların, sərhədlərin açılmasından gedirsə, o zaman biz sadəcə buna hazır olmalıyıq. O mənada hazırıq ki, bizdə, məsələn, istənilən ssenariyə uyğunlaşmağa və gömrük nəzarətini həyata keçirməyə imkan verən müvafiq avadanlıq və mexanizmlərə malik Marqara keçid məntəqəsi var", - deyə Akopyan qeyd edib. .

O, Ermənistanın təklif etdiyi sadələşdirilmiş yüklərin Naxçıvana tranzitinin təfərrüatlarını açıqlamayıb və qeyd edib ki, artıq ölkənin baş naziri və baş nazirinin müavini ictimaiyyətə açıqlana biləcək bütün detallar barədə məlumat verib.

Eyni zamanda, Dövlət Gəlirləri Komitəsinin rəhbəri qeyd edib ki, Gürcüstan və İranla sərhəd hissələrində artıq sadələşdirilmiş rejimlər qüvvədədir. Məsələn, mallar üçün “yaşıl” və “qırmızı” dəhlizlər var.

"Bir sıra göstəricilərin təhlili əsasında risklərin qiymətləndirilməsi sistemi malları "yaşıl", "sarı" və ya "qırmızı" marşruta göndərir. Bəyannamə əvvəlcədən doldurulduğundan və heç bir risk olmadığı üçün "yaşıl" marşrut sərhəddən maneəsiz keçidi nəzərdə tutur. Biz də pilot proqrama start vermişik - məlumatların təhlili əsasında idxal olunan malların avtomatik olaraq riskə yol verilmədiyini görürük. Sərhədin digər hissələrində olduğu kimi, Azərbaycandan gələn mallara münasibətdə Dövlət Gəlirləri Komitəsi öz səlahiyyətləri çərçivəsində maksimum nəzarəti həyata keçirəcək", - deyə Akoyan sözlərini yekunlaşdırıb.