Gəncədən olan deputat: Ermənistanın məqsədi vətəndaşlarımızı qətlə yetirmək və təşvişə salmaqdır

Bu gecə məkirli düşmən Gəncədə mülki vətəndaşlara hədəflənmiş raketlər atıb. Çox təəssüflər olsun ki, ermənilər növbəti dəfə bizi aldatdı, növbəti dəfə hiylə etdilər, terror törətdilər.

Avtosfer.az xəbər verir ki, bunu Trend-ə Gəncədən olan deputat Naqif Həmzəyev deyib.

O bildirib ki, ermənilərin etdiyi bu əməllərə dünya susmamalıdır və dünya ictimaiyyət, beynəlxalq təşkilatlar nəhayət ki, anlamaldır ki, bu düşmən çox məkirlidir, çox yalançıdır və onlar üçün dinc vətəndaş və ya hərb meydan fərq etmir, onların hədəfi dinc vətəndaşlarımızı qətlə yetirmək və vətəndaşları təşvişə salmaqdır:

“Möhtərəm Prezidentimiz, Ali Baş Komandanımızın söylədiyi kimi bu, düşmənə son şans idi, onlar bu şansı düzgün dəyərləndirmədilər. Ordumuz hərb meydanında düşmənin cavabını 10 qat artıq verəcək və işğal altında olan torpaqlarımız tezliklə işğaldan azad ediləcək. Bütün gəncəlilərin əhval-ruhiyyəsi yaxşıdır, biz Ali Baş Komandanın əmrini gözləyirik, hər an döyüşməyə hazırıq”.