Göldə balıqların kütləvi ölümü ilə bağlı - RƏSMİ - VİDEO

Bakının Məhəmmədi kəndi ərazisindəki su hövzəsində balıqlar kütləvi şəkildə tələf olub.  

Avtosfer.az xəbər verir ki, bu barədə sosial şəbəkədə görüntülər yayılıb. 

Onların kütləvi ölümünün hansı səbəbdən baş verdiyi məlum deyil.

Məsələ ilə bağlı Kənd Təsərrüfatı Nazirliyinə müraciət etdik. Nazirlikdən sorğumuza cavab olaraq bildirildi ki, balıqların kütləvi ölümü ilə bağlı araşdırma aparılır: “Abşeron rayonu Məhəmmədi kəndində yerləşən göldə balıqların kütləvi ölümü ilə bağlı Kənd Təsərrüfatı Nazirliyinin Aqrar Xidmətlər Agentliyi (AXA), Kənd Təsərrüfatı Nazirliyinin Baytarlıq Elmi-Tədqiqat İnstitutu və Azərbaycan Respublikasının Qida Təhlükəsizliyi Agentliyi (AQTA) tərəfindən araşdırma aparılır. Hər üç dövlət qurumunun mütəxəssisləri tərəfindən əraziyə baxış keçirilib, sudan və balıqlardan nümunələr götürülüb. Nümunələr AXA-nın Laboratoriya, Ekspertiza və Sertifikatlaşdırma Mərkəzi, Kənd Təsərrüfatı Nazirliyinin Baytarlıq Elmi-Tədqiqat İnstitutu və Azərbaycan Qida Təhlükəsizliyi İnstitutunun laboratoriyalarına təqdim edilib. Aparılacaq analizlərin nəticəsi əldə edildikdən sonra ictimaiyyətə ətraflı məlumat veriləcək” .