Qarabağ qazisinin maşınını vuran avtobus sürücüsü onu hədələdi: "Bilirsən mənim dalımda duran kimdir?"

Vətəndaş Bakir Abdullayev 211 nömrəli marşurut avtobusunun sürücüsü Tural Süleymanovdan şikayətçidir. Bu barədə Avtosfer.az-a məlumat verən vətəndaş bildirib ki, "20 Yanvar" dairəsi istiqamətində hərəkətdə olarkən qaydaları kobud şəkildə pozan 10 TF 965 dövlət nömrə nişanlı, 211 nömrəli müntəzəm marşurut xətti ilə hərəkət edən avtobus onun idarə etdiyi "Mercedes" markalı maşını vurub. "Avtomobildən düşüb məsələni aydınlaşdırmaq istəyirdim. Bu zaman sürücü avtobusdan düşərək üzrxahlıq etmək əvəzinə kobud şəkildə danışmağa başladı. "Vurmuşam əcəb eləmişəm, bilirsən mənim dalımda duran kimdir? Get nə bilirsən elə" kimi ifadələr işlətdi. 
Hadisə yerinə sığorta şirkətinin əməkdaşları və yol polisi gəldi. Onlar da günahın avtobus sürücüsündə olduğunu təsdiq etdilər."
Bakir Abdullayev deyir ki, sürücünün bu cür hərəkəti ona pis təsir edib. "Qəzadır, hər kəsin başına gələ bilər. Amma bu cür davranış yolverilməzdir. Necə yəni, mənim dalımda filankəs durur. Məgər ölkə dərəbəylikdir?"
Qeyd edək ki, Bakir Abdullayev Qarabağ qazisidir.
 

Fərid