Qazaxıstan MN Xəzər dənizində gəmi və aviasiya vasitələrinin iştirakı ilə təlimlər keçirib

Qazaxıstan Müdafiə Nazirliyi Xəzər dənizində gəmi və aviasiya vasitələrinin iştirakı ilə təlimlər keçirib.

Qazaxıstan Müdafiə Nazirliyi hərbi-dəniz gəmilərinin, Milli Təhlükəsizlik Komitəsinin Manqistau vilayəti üzrə sərhəd xidmətinin və hərbi aviasiyanın iştirakı ilə Xəzər dənizinin Qazaxıstan sektorunda komanda qərargah təlimləri keçirib.

Bu barədə nazirliyin mətbuat xidmətindən məlumat verilib.

“Dənizdəki manevrlər dəniz qüvvələrinin bölmələrinin və sərhəd xidməti departamentinin idarə edilməsində koordinasiya və praktiki bacarıqların təkmilləşdirilməsinə, şəxsi heyətin döyüş hazırlığının artırılmasına yönəlib”, - deyə məlumatda bildirilib.

Qeyd olunub ki, təlimlərdə iştirak edənlərin ümumi sayı min nəfəri keçib. Gəmilərin ekipajları aşağı intensivlikli münaqişələrdə dəniz qüvvələri tərəfindən döyüş əməliyyatlarının hazırlanması və aparılması üzrə normativləri yerinə yetiriblər.

“Təlimlər çərçivəsində Xəzər dənizinin Qazaxıstan sektorunda dəniz iqtisadi fəaliyyətinin mühafizəsi və müdafiəsi ilə bağlı məsələlər nəzərdən keçirilib. Döyüş təlimləri və saxta düşmənin yerüstü və hava hədəflərinə artilleriya atəşi icra olunub. Digər nəzarət orqanları ilə qarşılıqlı fəaliyyətə xüsusi diqqət yetirilib”, - deyə Qazaxıstan Silahlı Qüvvələrinin Baş Komandanı Saken Bekjanov bildirib.

oxu.az