Səudiyyə Ərəbistanı koronavirus pandemiyasına görə 60 min nəfərlik say məhdudiyyəti tətbiq edilməklə yalnız ölkə vətəndaşlara Həcc ziyarətinə icazə verib.

Avtosfer.az SPA-ya istinadən verdiyi məlumata görə, bu barədə Həcc və Ümrə Nazirliyi açıqlama yayıb.

Bildirilib ki, bu il iyul ayının ortalarında başlayacaq ziyarətdə 18-65 yaş arası zəvvarlar iştirak edə biləcək.

“Hər il zəvvarları qəbul etməkdən qürur duyan Səudiyyə Ərəbistanı Kralığı bu tənzimləmənin zəvvarların sağlamlığı, təhlükəsizliyi, mühafizəsinə davamlı qayğıdan, habelə onların ölkələrinin təhlükəsizliyindən irəli gəldiyini təsdiqləyir”, - açıqlamada vurğulanıb.

Ötən ilki həcc ziyarətində iştirak etmək üçün ölkədə yaşayan vur-tut 1000 nəfər xüsusi seçilmişdi. İştirakçıların üçdə ikisi adətən həcc ziyarətində iştirak edən 160 millətin nümayəndələri, üçdə biri isə Səudiyyə Ərəbistanı təhlükəsizlik və tibbi işçiləri olub.

Bütövlükdə həcc ziyarətinə hər il dünyanın müxtəlif ölkələrindən 2 milyonadən zəvvar gəlir.