Vəzifəli şəxslər məhkəmə zalında həbs edildi

250 min manatlıq dələduzluqda ittiham edilən məmurların məhkəməsi başa çatıb.

Avtosfer.az xəbər verir ki, Pəhlivan Güləliyev, Yusif Balabəyov və Azər Əliyev Cinayət Məcəlləsinin 178.3.2-ci (külli miqdarda dələduzluq) maddəsi ilə təqsirli biliniblər.

Bildirilib ki, P.Güləliyev uzun müddət Əmlak Məsələləri Dövlət Xidmətinin müxtəlif idarələrində yüksək vəzifələrdə, eləcə də Şirvan layihə tədqiqat idarəsinin rəisi postunda çalışıb.

Dələduzluq cinayəti baş verərkən isə o, “Daşınmaz Əmlakın Dövlət kadastrı və reyestri” publik hüquqi şəxsin tabeliyindəki MMC-də mühəndis olub. Azər də onun kimi qurumun mühəndisi vəzifəsində çalışıb. Digər təqsirləndirilən şəxs isə daha əvvəl Şamaxıda bələdiyyədə mühasib kimi çalışıb.

Elə həmin müştərini də Yusif tapıb. Belə ki, Pərvin adlı şəxs ona müraciət edərək Yeni Suraxanı qəsəbəsində uçurum formasında olan 2,35 hektar sahibsiz torpaq sahəsi tapdığını və onu sənədləşdirmək istədiyini bildirib. Yusif də Əmlak Məsələləri Dövlət Xidmətində tanışlarının olduğunu deyib və onları bu işə cəlb edib. Həmin şəxslər Pərvinə bu işi 250 min manat qarşılığında həll edəcəklərini, torpağı 25 yerə bölərək hərəsi 10 sot olmaqla 25 müxtəlif şəxsin adına rəsmiləşdirəcəklərinə söz veriblər.

Lakin adları çəkilən şəxslər 250 min manat pul alsalar da, ərazisində yerləşən magistral neft və qaz kəmərlərinin mühafizə zonası olmaqla “Sənaye, nəqliyyat, rabitə, müdafiə və digər torpaqlar” kateqoriyasına aid dövlət mülkiyyəti olan 2,35 ha torpaq sahəsini özəlləşdirə bilməyiblər. Verdiyi pulları da geri ala bilmədiyini görən Pərvin bununla bağlı Baş Prokurorluğun Korrupsiyaya qarşı Mübarizə Baş İdarəsinə müraciət edib və cinayət işi açılıb.

(qafqazinfo)