Vüsal Quliyev: Həmkarlar ittifaqları fəaliyyətlərini daha da gücləndirməlidirlər

Azərbaycan Həmkarlar İttifaqları Konfederasiyası (AHİK) və tabeliyində olan üzv təşkilatlar tərəfindən Azərbaycanın mədəniyyət paytaxtı Şuşa şəhərində "Vətəndaş cəmiyyətində həmkarlar ittifaqlarının rolu” mövzusunda konfrans keçirilib.

Konfransda Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev çıxış edərək həmkarlar ittifaqlarının cəmiyyətdəki əhəmiyyətli rolunu qeyd edib. Bildirib ki, həmkarlar ittifaqlarının fəaliyyətinin mərkəzində insan faktoru dayanır və bu qurumlar onların əmək hüquqlarının qorunmasına, sosial problemlərinin həllinə və iqtisadi maraqlarının qorunmasına xidmət edir. Bu xüsusda həmkarlar ittifaqları fəaliyyətlərini daha da gücləndirməli, üzvlərinin maraqlarını hər zaman qorumalıdırlar. 

 V.Quliyev regionlarda müxtəlif sahələr üzrə həmkar ittifaqlarına üzv şəxslərin həmin qurumlara əlçatanlığının təmin olunması məsələlərinə də toxunub. Bildirib ki, qısa zamanda regionlarda silsilə görüşlərin keçirilməsinə, həmkar ittifaqlarının fəaliyyətinin nəzərdən keçirilməsinə ehtiyac var. 

 Şəhid ailələri və müharibə iştirakçılarının həmkarlar ittifaqlarının daima diqqət mərkəzində olduğunu qeyd edən V.Quliyev, bu istiqamətdə işlərin davam etdirilməsinin vacibliyini vurğulayıb. 

O, həmkarlar ittifaqlarının qabaqcıl ölkələrdə anoloji qurumlarla qarşılıqlı əməkdaşlıq məsələlərinə toxunaraq, beynəlxalq əlaqələrin əhəmiyyətini qeyd edib. 

V.Quliyev həmkarlar ittifaqlarının nümayəndələrinin həm mərkəzi, həm də yerli icra hakimiyyəti orqanları yanında yaradılan ictimai şuralarda təmsilçiliyi ilə bağlı fikirlərini də bölüşərək, ictimai nəzarətin həyata keçirilməsində onların fəallığının artırılması istiqamətində iş aparılmasına ehtiyac olduğunu bildirib.