Xəzər dənizinin dibi araşdırıldı: "Google Maps"də əks olunan sirli gəmi aşkarlandımı? - VİDEO - FOTO

Qazaxıstanın Manqistau vilayətinin turizm idarəsinin və fövqəladə hallar departamentinin əməkdaşları "Google Maps" fotolarında silueti aşkar olunan və batdığı ehtimal edilən gəminin koordinatlarının müəyyən olunması üçün Xəzər dənizində araşdırma aparıblar.

Avtosfer.az-ın xəbərinə görə, bu barədə Tengrinews.kz nəşri məlumat verib.

Fövqəladə Hallar Departamentinin məlumatına görə, mütəxəssislər Melovoy Roqdan 1.5 km məsafədə dənizin dibini yoxlayıblar, çünki fotolarda əks olunan batmış gəmi məhz orada ola bilərdi.

"Xilasedicilər dənizin dibinin tədqiqi üçün "Y-150" dərinlik skanerinin əks-sədasından istifadə ediblər. Tədqiq olunan ərazidə dərinlik 9-10 metr təşkil edib. Nəticədə batmış obyektlər aşkar edilməyib. Tədqiqata əsasən, həmin ərazidə batmış gəmi ilə bağlı məlumatın yalan olduğu müəyyən edilib", - deyə Manqistau vilayətinin Fövqəladə Hallar Departamentindən bildirilib.

Xatırladaq ki, dekabrın 8-də "Google Maps"in peyk fotolarında batmış gəmi olduğu ehtimal edilən obyektin konturları görünmüş və uzunluğunun təxminən 70 metr, eninin isə 15 metr olduğu ehtimal edilmişdi.

Yerli balıqçılar iddia edirdilər ki, bu ərazi əvvəllər diqqət çəkməyib, obyekt isə Xəzər dənizinin dayazlaşması səbəbindən nəzərə çarpıb.

Dəniz marşrutlarının monitorinqi ilə məşğul olan logistika şirkətlərindən biri isə qeyd edib ki, əvvəllər belə məlumatlar qeydə almayıblar.

(oxu.az)