Yeni Zelandiyaya ilk P-8 “Poseidon” dəniz patrul təyyarəsi təhvil verilib

“Boeing” şirkəti Yeni Zelandiya Hərbi Hava Qüvvələrinin sifariş verdiyi 4 ədəd ilk P-8 “Poseidon” dəniz patrul təyyarəsinin birincisini təhvil verib. Ordu.az xəbər verir ki, bu barədə şirkətin mətbuat xidməti məlumat yayıb.

Təyyarə şirkətin Vaşinqton ştatının Renton şəhərindəki istehsalat müəssisəsində təqdim olunub.

Yeni sifariş verilən təyyrələr Yeni Zelandiya Hərbi Hava Qüvvələrinin hazırda istifadə etdiyi 6 ədəd P-3K2 “Orion” təyyarələrini əvəz edəcək.

2,3 milyard Yeni Zelandiya dolları (1,45 milyon ABŞ dolları) dəyərində müqavilə əsasında alınan P-8-lərin hava qüvvələrinin dəniz patrul imkanlarını gücləndirəcəyi və ölkənin ərazi sularında vəziyyətlə bağlı məlumatlılığı artıracağı gözlənilir.

P-8 sualtı və suüstü döyüşlər üçün nəzərdə tutulub. Təyyarə 12.500 metr hündürlüyə çata və saatda 900 kilometr sürətlə hərəkət edə bilər.

Təyyarə hətta son dərəcə aşağı temperaturlu bölgələrdə belə, ən yüksək performansı saxlamaq üçün hazırlanıb.

Modelin iki variantı var: Hindistan Hərbi Dəniz Qüvvələri tərəfindən istifadə edilən P-8I və Böyük Britaniya Hərbi Hava Qüvvələri, Norveç Hərbi Hava Qüvvələri, Avstraliya Hərbi Hava Qüvvələri və ABŞ Hərbi Dəniz Qüvvələrində xidmətdə olan P-8A “Poseidon”. Koreya Respublikası Hərbi Dəniz Qüvvələri və Almaniya Hərbi Dəniz Qüvvələri də patrul əməliyyatları üçün təyyarə alıb.