Gündüz yaranan təhlükə və ya ağıllı radar quraşdırmağın vaxtı çatmayıbmı?

Əslində bu mövzuya təkrar qayıtmaq istəməsəm də ötən gün Bakı-Qazax yolunda rastlaşdıqlarım bunu yazmağa vadar edir. 

Bakı-Qazax yolunda  radarların  çoxluğu hamıya məlumdur. Bunların yerini isə nəinki sürücülər, hətta sərnişinlərin böyük hissəsi əzbər tanıyır. Əksər sürücülərin hərəkət fəlsəfəsi eynidir: radarın qarşısından yavaş keç, sonrasını özün bilərsən. Təhlükə də elə burdan başlayır. 
Sürət həvəskarı olan, lakin radara da düşmək istəməyənlər də tam sürətlə hərəkətdə olarkən uzaqdan radar  gördükdə sürəti kəskin azaldır, bəzən isə eyni istiqamətdə olan avtomobilin qarşısına keçirlər. Elə mənim hərəkət etdiyim avtomobilə də 3 dəfə təhlükə yaradıldı. 
Arxa oturacaqda olduğum üçün bu situasiyanı şəkməyə imkan olmadı və əslində heç ehtiyac da yoxdur.  Çünki bu hal hər gün deyil, hər saat təkrarlanır. Bunun ən yaxşı sübutu stasionar radarların qarşısındakı tormoz izləridir. 
Hələ ki, bir çox sürücü radarı aldatmaqla, Bakıdan Gəncəyə 3 saatdan az vaxta çatmağı ilə fəxr edir. Lakin bu cür məsuliyyətsiz sürücülərlə mübarizənin də çox müasir üsulu var. Ağıllı radar, və ya digər adı ilə orta sürət radarları quraşdırmaqla problemi birdəfəlik həll etmək mümkündür.  Bəs görəsən nə üçün texnologiyanın bu nailiyyətindən faydalanmaqda ləngiyirik?