Xarici sürücülük vəsiqəsini dəyişmədikdə sürücünü nə gözləyir? - VİDEO

Azərbaycana gəlmiş xarici ölkə vətəndaşları sürücülük vəsiəqəsini dəyişdirmədikləri halda yol polisləri ilə bağlı problem yaşayırlar. Sürücülər redaksiyamıza müraciət edərək bildirir ki, xarici ölkədən aldıqları vəsiqəni Azərbaycan nümunəli sürücülük vəsiqəsinə dəyişdirmədikləri halda yol polisləri tərəfindən cərimələnirlər.

Bəs buna görə qanunvericilikdə cərimə nəzərdə tutulub, yoxsa yox?

Hüquqşünas Ərşad Hüseynov bildirib ki, buna görə cərimə yazılması qanunsuzdur. “Yol Hərəkəti Haqqında Qanunun 35-1 ci maddəsinə əsasən Azərbaycanda yaşayış üçün icazə almış şəxs, xaricdə almış sürücülük vəsiqəsini 1 ay müddətinə istifadə edə bilər. 1 ayın tamamında xaricdən aldığı vəsiqəni Azərbaycan nümunəli sürücülük vəsiqəsinə dəyişməlidir. Bunu dəyişmədikdə isə inzibati məsuliyyət yaratmır və ona heç kim deyə bilməz ki, sürücülük hüququn yoxdur”.

Ərşad Hüseynov onu da qeyd edib ki, turist kimi gəlib 90 gün müddətinə Azərbaycanda qalan xarici ölkənin vətəndaşları sürücülük vəsiqəsini dəyişməyə də bilər.

Qeyd edək ki, qanuna əsasən Azərbaycan Respublikasının vətəndaşı yol hərəkətinin tənzimlənməsi sahəsində Azərbaycan Respublikasının tərəfdar çıxdığı beynəlxalq müqavilələrə uyğun olaraq xarici dövlətin səlahiyyətli orqanı tərəfindən verilmiş və etibarlıq müddəti qurtarmamış sürücülük vəsiqəsi əsasında Azərbaycan Respublikası ərazisində nəqliyyat vasitələrini ölkə ərazisinə daxil olduğu gündən bir ay ərzində idarə etmək hüququna malikdir. Azərbaycan Respublikasının vətəndaşı ölkə ərazisində nəqliyyat vasitələrini həmin müddətdən artıq idarə etmək üçün sürücülük vəsiqəsini dəyişdirməlidir. Amma qeyd etdiyimiz kimi bunu dəyişmədikdə belə inzibati məsuliyyət yaratmır və sürücülük hüququ olmaması anlamına gəlmir.

Təbriz