Zaqatalada toy karvanında "avtoş"luq edən qazilər - Rayonda nə baş verir? - VİDEO

Zaqatala rayonunda toy karvanında avtoxuliqanlıq edən daha bir neçə sürücünün videosu yayılıb. Avtosfer.az xəbər verir ki, videoda “VAZ 2107” markalı 3 avtomobilin toy karvanında hərəkət etdiyi əksini tapıb. Sürücülər təhlükəli manevrlər edərək sağ-sol hərəkətlərlə şou göstərirlər.

Qeyd edək ki, 2 gün əvvəl Avtosfer.az saytında Zaqatala rayonunda daha bir avtoxuliqanın toy karvanında etdiyi hərəkətlər barədə videogörüntülər yayılmışdı. Avtomobili geriyə idarə edən sürücü əl tormozundan istifadə edərkən maşın aşmışdı. Video yayılandan sonra polis hərəkətə keçib və həmin sürücü saxlanılaraq 25 gün müddətinə inzibati qaydada həbs olunub.

Sonuncu video mayın 15-də çəkilib. Zaqatala rayonunda avtoxuliqanlıq edən sürücülərdən ikisinin qazi olduğu bildirilir. Avtosfer.az-a verilən məlumata görə, belə hallar təssüflər olsun ki, Zaqatala rayonunda mütəmadi olaraq baş verir. Artıq vəziyyət təhlükəli həddədir, sakinlər narahatdır.

Nərminə Əli